Viloyat hokimi Xayrullo Bozorov tumanda yangi bunyod etilgan mehmonxonada ham bo‘lib, xizmat ko‘rsatish sifati va imkoniyatlarini kengaytirish yuzasidan zaruriy ko‘rsatma, taklif va tavsiyalarini berdi.
2020 - 2022 yillarda tumanni ijtimoiy – iqtisodiy rivojlantirish dasturidan «NORIN GLOBEX AVTOTRANS» MChJ tomonidan mikrologistika markazini vujudga keltirish loyihasi ro‘yobi uchun «Bo‘zo‘lmas» MFY hududidan 0,5 gektar yer ajratilgan. 4,5 mlrd. so‘m mablag‘ hisobiga mikrologistika – transport xizmati, 20 o‘rinli mehmonxona va qishloq xo‘jaligi mahsulotlarini saqlash uchun 500 tonnali sig‘imdagi muzlatkich barpo etish jarayonlari ketmoqda.
Dastlabki bosqichda mikrologistika transport xizmati joriy yilning 28 aprelidan faoliyatini rasman yo‘lga qo‘ydi. 20 tonna yuk tashishga mo‘ljallangan yettita yirik avtotransport vositasida Rossiya va Yevropaning turli shaharlariga yuk tashilmoqda. Navbatdagi bosqichda mehmonxona qurilishi uchun 2 mlrd. so‘m mablag‘ sarflandi, ayni zamonda jihozlash - pardozlash ishlari oxirlab qoldi.
Mehmonxonada hozirgi kun talablariga mos ravishda barcha sharoitlar muhayyo etildi. Loyihaning 3 – bosqichida amalga oshirish nazarda tutilgan qishloq xo‘jaligi mahsulotlarini saqlashga mo‘ljallangan muzlatkich qurilishida montaj ishlari olib poyoniga yetkazilmoqda.
3 - yo‘nalishni o‘zaro bog‘laydigan loyihaning bajarilishi natijasida 20 dan ziyod yangi ish o‘rni yaratilishi barobarida qishloq xo‘jaligi mahsulotlarini sifatli saqlagan holda to‘g‘ridan - to‘g‘ri xorij va MDH mamlakatlariga eksport qilish imkoni ham paydo bo‘ladi.